مریشكێك، سه‌ری دوو كه‌سی خوارد!

دادگای‌ كه‌تنی‌ ئیسماعیلیه‌ی‌ میسر دۆسیه‌ی‌ هاوڵاتییه‌كی‌ ڕه‌وانه‌ی‌ لای‌ موفتیی وڵات كرد بۆ ڕاوه‌رگرتنی‌ له‌باره‌ی‌ حوكمی‌ له‌سێداره‌دانی‌ ئه‌و هاوڵاتییه‌ به‌هۆی‌ كوشتنی‌ ژنه‌كه‌ی‌ ‌و دراوسێیه‌كی‌ له‌سه‌ر مریشكێك!
تۆمه‌تباره‌كه‌ كه‌ هه‌ریه‌ك له‌ محه‌مه‌د عه‌بدولعه‌زیزی‌ ته‌مه‌ن 58 ساڵی‌ دراوسێی ‌و سه‌ماح عوسمانی‌ ته‌مه‌ن 58 ساڵی‌ ژنی‌ خۆی‌ له‌ڕێی‌ چه‌كی‌ میكانیكی قه‌ده‌غه‌كراوه‌وه‌ كوشتووه‌، دوای‌ دروستبوونی‌ مشتومڕ له‌نێوانیاندا به‌هۆی‌ مریشكێكه‌وه‌ كه‌ چووه‌ته‌ ماڵی‌ تۆمه‌تباره‌كه‌وه‌.
كاتێك قوربانیی یه‌كه‌م داوای‌ مریشكه‌كه‌ی‌ كردووه‌ته‌وه‌، ده‌مه‌قاڵێ‌ له‌نێوان هه‌ردوولادا دروستبووه‌ ‌و تۆمه‌تباره‌كه‌ چه‌ند فیشه‌كێكی‌ ته‌قاندووه‌، سه‌ره‌نجام دراوسێكه‌ی‌ گیانی‌ له‌ده‌ستداوه‌ ‌و ژنه‌كه‌یشی‌ به‌برینداری‌ ڕه‌وانه‌ی‌ نه‌خۆشخانه‌ كراوه‌ ‌و پاشان ئه‌ویش گیانی‌ له‌ده‌ستداوه‌! جگه‌له‌وانیش خزمێكی‌ ژنه‌كه‌ برینداربووه‌.
هه‌ر له‌وچوارچێوه‌یه‌دا ئیداره‌ی‌ گشتیی ئه‌نجومه‌نه‌كانی‌ پزیشكیی ده‌روونی، له‌ ڕاپۆرتێكدا بۆ دادگاكه‌ ئه‌وه‌ی‌ خستووه‌ته‌ڕوو كه‌ تۆمه‌تبار به‌هیچ شێوه‌یه‌ك نه‌خۆشیی ده‌روونیی نییه‌ ‌و باری‌ ده‌روونیی جێگیره‌. هه‌ربۆیه‌ش دادگا بڕیاری‌ له‌سێداره‌دانی‌ بۆ ده‌ركردووه‌ ‌و چاوه‌ڕوانی‌ دواقسه‌ی‌ موفتییه‌ له‌باره‌یه‌وه‌.